અમેરિકાનો રોબિન હૂડ

અમેરિકાનો રોબિન હૂડ: આખી જિદંગી બૂટ પોલિશ કરી કમાયેલા દોઢ કરોડ રૂપિયા હોસ્પિટલને દાન કર્યા         

અમેરિકાના પેન્સિલ્વેનિયામાં રહેતા આલ્બર્ટ લેક્સિ બાળકોની હોસ્પિટલ બહાર જૂતા રિપેરિંગનું, પોલિશનું કામ કરતા હતા. શહેરમાં તેમની છબી રોબિન હૂડની હતી. કારણ એ હતું કે આલ્બર્ટ જે પણ કમાતા હતા તે તમામ રકમનું બાળકોને જ દાન કરતા હતા. આવું 25 વર્ષથી ચાલી આવતું હતું. ગયા સપ્તાહે આલ્બર્ટનું નિધન થયું. ત્યારબાદ એક સંસ્થા તેમને જિંદગીભર આપેલા દાનની રકમ ગણી તો તે રકમ 2 લાખ ડૉલર એટલે કે દોઢ કરોડ રૂપિયા સુધી પહોંચી ગઈ.આલ્બર્ટ ફ્રી કેર ફંડ નામની સંસ્થા દ્વારા બાળકોના અભ્યાસ માટે દાન આપતા હતા. તેમની પાસે મહિના-બે મહિનામાં જે રકમ ભેગી થતી હતી તે આ સંસ્થાને આપી દેતાં હતા. તેમના મૃત્યુ બાદ સંસ્થાએ તપાસ કરી તો ફ્રી કેર ફંડ પણ આશ્ચર્યમાં પડી ગયું. આલ્બર્ટ જે હોસ્પિટલ સામે બેસીને જૂતાને પોલિશ કરતા હતા ત્યાંના ચીફ ડૉક્ટર ગેસનર કહે છે કે 1982ની વાત છે. હું હોસ્પિટલમાં જોડાયો તો જોયું કે એક પોલિશ કરનાર પણ રોડ પર બેસીને કામ કરતો હતો.વર્ષો વિતતા ગયા. તે માણસ ચૂપચાપ પોતાનું કામ કરતો હતો. તે સવારે 5 વાગે પોતાના ગામથી 2 કલાકની મુસાફરી કરી હોસ્પિટલ સામે આવી બેસતો હતો અને પોતાનું કામ શરૂ કરતો હતો. ધીરે ધીરે લોકો તેને ઓળખવા લાગ્યા. તેનું નામ આલ્બર્ટ હતું. 1994-95માં અમને આલ્બર્ટની કથા ખબર પડી. બાળકોની હોસ્પિટલ સામે બેસવાથી તેને બાળકો માટે ઘણો પ્રેમ હતો. એક પોલિશના તે 2 ડોલર કમાતો હતો. પૈસા બચાવી તે તમામ બાળકોને અભ્યાસ માટે કામ કરતી એક સંસ્થાને આપતો હતો. જ્યારે લોકોને આ વાતનો ખ્યાલ આવ્યો ત્યારે લોકો માત્ર આલ્બર્ટના ઉમદા કામમાં મદદ કરવા તેની પાસે પોલિશ કરાવતા હતા.